ડૉ. વિપુલ જાંબુચા એક બહુમુખી વ્યક્તિત્વ ધરાવતા સર્જક છે. લેખક, ફિલ્મ નિર્માતા, અભિનેતા અને વિચારક તરીકે તેમણે વિવિધ ક્ષેત્રોમાં નોંધપાત્ર યોગદાન આપ્યું છે. વ્યવસાયિક જીવનમાં તેઓ છેલ્લાં 27 વર્ષથી વધુ સમયથી પ્રોજેક્ટ મૅનેજમેન્ટ અને રિન્યુએબલ એનર્જી ક્ષેત્ર સાથે સંકળાયેલા છે. ભારત ઉપરાંત વિશ્વના વિવિધ દેશોમાં પણ તેઓએ રાષ્ટ્રીય અને આંતરરાષ્ટ્રીય સ્તરના રિન્યુએબલ એનર્જી પ્રોજેક્ટ્સ સાથે કાર્ય કરીને મહત્ત્વપૂર્ણ અનુભવ પ્રાપ્ત કર્યો છે. ઊર્જા ક્ષેત્રના તેમના વ્યાપક અનુભવને કારણે તેઓ ઉદ્યોગજગતમાં એક અનુભવી પ્રોજેક્ટ નિષ્ણાત તરીકે ઓળખાય છે. સર્જનાત્મક ક્ષેત્રમાં પણ ડૉ. જાંબુચાનો રસ સમાન રીતે પ્રગટ થયો છે. તેઓ ‘Eight Eyes Production House’ના સ્થાપક છે અને ગુજરાતી ફિલ્મ તથા મીડિયા ક્ષેત્રમાં લેખક, અભિનેતા અને નિર્માતા તરીકે સક્રિય રહ્યા છે. તેમની સર્જનાત્મક યાત્રામાં તેઓએ અત્યાર સુધી ચારથી વધુ ફિલ્મો અને 12થી વધુ શોર્ટ ફિલ્મો અને ફિલ્મી ગીતોનું લેખન કર્યું છે. તેમની રચનાઓમાં સમાજજીવન, માનવીય સંબંધો અને સંસ્કૃતિનાં મૂળ મૂલ્યોને સ્પર્શતી લાગણીઓ સ્પષ્ટપણે જોવા મળે છે. તેમની રચનાત્મક દૃષ્ટિનો એક મહત્ત્વપૂર્ણ પડાવ છે ‘જીવનઆખ્યાન’. આ તેમની પ્રથમ કથા છે. જેના આધાર પર એક ગુજરાતી પિક્ચર ફિલ્મ પણ નિર્માણ પામી હતી અને વર્ષ 2021 દરમિયાન સિનેમાઘરોમાં પ્રદર્શિત થઈ હતી. મૂળે ફિલ્મની પટકથા તરીકે રચાયેલી આ કથાને પછી નવલકથાના સ્વરૂપમાં રજૂ કરવામાં આવી છે, જેથી વાચકો સુધી તેની લાગણીસભર દુનિયા વધુ નજીકથી પહોંચી શકે. ‘જીવનઆખ્યાન’માં ગુજરાત, સૌરાષ્ટ્ર અને કચ્છની ગલીઓમાં જીવંત રહેલી લોકકલા આખ્યાન અને તેને જીવંત રાખનારા સામાન્ય કલાકારોના જીવનસંઘર્ષને સંવેદનાત્મક રીતે રજૂ કરવાનો પ્રયત્ન કરવામાં આવ્યો છે. આ કથા માત્ર પાત્રોની જ નથી, પરંતુ એક એવી સંસ્કૃતિની પણ છે, જે સમયના પ્રવાહમાં ધીમે ધીમે અદૃશ્ય થતી જઈ રહી છે. ડૉ. વિપુલ જાંબુચા માટે સર્જન માત્ર કલ્પના નથી; તે જીવનના અનુભવો, સમાજના અવલોકન અને સંસ્કૃતિ પ્રત્યેના પ્રેમનું પ્રતિબિંબ છે. તેમના લેખનનો હેતુ માત્ર વાર્તા કહેવાનો નથી, પરંતુ વાચકના હૃદય સાથે એક લાગણીસભર સંવાદ રચવાનો છે – જ્યાં જીવન, સંસ્કૃતિ અને માનવીય સંબંધોની ઊંડાઈ સ્પષ્ટ અનુભવી શકાય.