વી. શંકર એક ઇન્ડિયન સિવિલ સર્વિસીસ (આઇ.સી.એસ.) અધિકારી હતા. તેમણે 1946થી, સરદાર વલ્લભભાઈ પટેલનું 1950માં અવસાન થયું, ત્યાં સુધી, છેલ્લા શ્વાસ સુધી જ નહીં પરંતુ તેમનાં અસ્થિ પ્રયાગમાં તારવામાં આવ્યાં ત્યાં સુધી, સરદાર પટેલના અંગત સચિવ તરીકે સેવા આપી હતી. તેમના એ કાર્યકાળ દરમિયાન એ સરદાર પટેલના અંગત સચિવ જ નહીં પરંતુ અત્યંત આપ્તજન તરીકે સરદાર પટેલની સાથે રહ્યા હતા. સરદારની એક તરફ પુત્રી મણિબહેન હતાં તો બીજી તરફ વી. શંકર હતા. સરદાર પટેલની ચિર: વિદાય પછી તેમણે બે ભાગમાં, અંગ્રેજીમાં ‘My Reminiscences Of Sardaar Patel’ નામનાં પુસ્તકો લખ્યાં હતાં, જેમાં સરદાર પટેલનાં જીવનનાં તમામ પાસાંને સુપેરે વણી લેવામાં એ સફળ થયા હતા. એ પુસ્તકોમાં સરદારની આંતરિક શક્તિ, કાર્યો તેમજ વ્યક્તિત્વનાં અનોખાં દર્શન થાય છે. એ એક આઇ.સી.એસ. ઑફિસર તરીકે સરદાર પટેલને મળ્યા તે પહેલાં વી. શંકરે આદરણીય મોરારજી દેસાઈ સાથે તેમના સચિવ તરીકે જોડાવાનું નક્કી કર્યું હતું, પરંતુ સરદાર પટેલને મળ્યા પછી એ સરદારના જીવનકાળ સુધી તેમના અત્યંત અંગત સચિવ તરીકે રહ્યા હતા. જો, વી. શંકર સરદારના અંગત સચિવ ન બન્યા હોત તો તેમણે સરદાર પટેલ વિશે લખીને જે રીતે તેમનું શબ્દચિત્ર દોરીને દેશની જનતા સમક્ષ મૂક્યું તેનાથી આપણે સૌ વંચિત રહી ગયા હોત.