Aami Tomake Bhalo Bashi

‘આમી તોમાકે ભાલો બાશી’ એટલે માત્ર વાર્તાસંગ્રહ નહીં, માણસને માણસ તરીકે જોવાની ઓગણીસ જુદી બારીઓ છે.

કોઈમાં વર્ષો જૂનું એક નામ માણસની આખી ઓળખ બની જાય છે, તો ક્યાંક ઉંમર વધે છતાં મન કોઈ પ્રિય વ્યક્તિની રાહ જોવાનું છોડતું નથી. કોઈ જગ્યાએ ‘પ્રેમ’ અને ‘હક’ વચ્ચેની સરહદ ધૂંધળી થઈ જાય છે, તો ક્યાંક ઘર હોવા છતાં પોતાનું ઘર મળતું નથી અને ક્યારેક મુક્તિ જ સૌથી મોટું બંધન બની જાય છે.

આ કથાઓમાં મોટા બનાવો કરતાં માણસની અંદર બનતી નાની નાની ઘટનાઓ વધારે મહત્ત્વની છે. એક નજર, એક સંબોધન, એક સ્મૃતિ, એક ગેરસમજ, એક અફસોસ… અને ક્યારેક માત્ર એક શબ્દ, જે આખા જીવનનો અર્થ બદલી નાખે છે.

અહીં સંબંધોના અનેક રંગોનો સ્પર્શ છે. ક્યાંક વાર્તા તમને ચોંકાવે છે, તો ક્યાંક તમને હસાવે છે, ક્યાંક અસ્વસ્થ કરે છે અને ક્યાંક ચૂપચાપ હૃદયમાં ઊતરી જાય છે. અહીં વાચક પોતાના સત્ય વિશે પણ વિચારવા મજબૂર થાય છે.

‘આમી તોમાકે ભાલો બાશી’ – ‘હું તમને પ્રેમ કરું છું.’
કેમ કે…
કેટલાક સંબંધોનું નામ હોતું નથી.
કેટલાક પ્રેમને સ્વીકાર મળતો નથી.
કેટલીક પીડા ક્યારેય શબ્દોમાં આવતી નથી.
અને કેટલીક વાર્તાઓ… પૂરી થઈ ગયા પછી પણ આપણી અંદર ચાલતી રહે છે.