Male Matters

પુરુષ દ્વારા, પુરુષ માટેનું આ પુસ્તક શું માત્ર પુરુષો માટે છે?

કોઈને થશે ‘Male મૅટર્સ’ એટલે શું? કોઈને એમ પણ થશે કે, શું આ પુસ્તક માત્ર પુરુષો માટે છે? શું આ પુસ્તક પુરુષો માટેની માર્ગદર્શિકા છે? તો જવાબ છે : ના, આ પુસ્તક માત્ર પુરુષો માટે નથી. આ પુસ્તકમાં પુરુષની વાસનાઓ બાબતની મિથની, સ્ત્રીઓ પ્રત્યે પુરુષના વલણની કે પુરુષે પ્રૉફેશનલ ફ્રન્ટ પર શું કરવું જોઈએ એ વિશેની વાતો જરૂર છે, પરંતુ આ પુસ્તક સ્ત્રીઓ માટે પણ એટલું જ જરૂરી છે. આખરે તો એ સ્ત્રીઓ જ હોય છે, જે આવતીકાલના પુરુષને ઉછેરતી હોય છે અને એ પણ સ્ત્રીઓ જ હોય છે, જે આજના પુરુષને સાચવતી હોય છે. તો પછી એકલો પુરુષ આ પુસ્તક વાંચીને શું કરશે?

પુરુષ આ સમાજવ્યવસ્થામાં સહેજ કઠોર, પરંતુ અત્યંત નિખાલસ પ્રાણી છે. સ્ત્રીઓને એ ક્યારેક લડી કાઢે ખરો, પરંતુ વાળવામાં આવે તો એ વળી પણ જાય. એ પણ આગળ-પાછળનું સઘળું ભૂલીને! પુરુષ પર પિતૃસત્તાક સમાજવ્યવસ્થા ચલાવવાનો આક્ષેપ જરૂર છે. તેમ છતાં એટલું ચોક્કસ કહી શકાય કે પિતૃસત્તાક વ્યવસ્થાનું વહન માત્ર પુરુષે નથી કર્યું. પુરુષને તો એ વ્યવસ્થામાં માધ્યમ બનાવાયો છે.

આ પુસ્તક આવી જ કેટલીક મિથ તોડે છે. જોકે અહીં એક સ્પષ્ટતા કરવી એ પણ જરૂરી છે કે અહીં પુરુષ એટલે સર્વગુણસંપન્ન, પુરુષ એટલે ડાહ્યો કે પછી પુરુષ જ આ સમાજ વ્યવસ્થામાં સર્વસ્વ છે એવું કશું પણ સિદ્ધ કરવાનો પ્રયત્ન નથી કર્યો. પણ એક વાત નક્કી છે કે આ પુસ્તક વાંચશો તો તમને એટલું જરૂર સમજાઈ જશે, કે આપણી સમાજવ્યવસ્થામાં પણ ‘Male મૅટર્સ’, મતલબ કે પુરુષનું આગવું મહત્ત્વ છે.