Jindagi Tu Mane Game Chhe

માત્ર શ્વાસ લેવો એ જિંદગી નથી. દરેક પળ સોળે કળાએ જીવી જાણવી એ જ જિંદગી છે. દુનિયાની કોઈપણ ફિલૉસૉફી પર નજર ફેરવી જાવ, એક વાત બધામાં કૉમન મળશે કે, વર્તમાનમાં જીવો! અત્યારે જે ક્ષણ છે એને માણો. જે વીતી ગયું છે એને ભૂલી જાવ અને જે આવ્યું નથી એની ચિંતા ન કરો. આપણે એવી વાતો કરીએ છીએ અને સોશિયલ મીડિયા પર સ્ટેટસ મૂકીએ છીએ કે, ‘જો ભી હૈ બસ યહી ઇક પલ હૈ!’ આવી કેટલીય પળો ચાલી જાય છે અને જીવવાનું સાઇડમાં રહી જાય છે. દરેક માણસે રોજ રાતે વિચારવું જોઈએ કે, ‘આજે આખા દિવસમાં હું ખરેખર કેટલું જીવ્યો છું?’ સરખું ન જીવ્યા હોવ તો હજુ પણ પૂરતી તક છે જ, જીવવાનું શરૂ કરી દો, જિંદગીને ગળે વળગાડો, જિંદગી આપણી રાહ જ જોતી હોય છે!