Amar Sher (Edited)

તું કહે છેઃ અશ્રુ ચાલ્યાં જાય છે,
હું કહું છુંઃ જિંદગી ધોવાય છે.
શયદા

નહિતર સિતારા હોય નહીં આટઆટલા,
કોઈ વિરાટ સ્વપ્નના ચૂરા થયા હશે.
અમૃત ‘ઘાયલ’

પહેલાં સમું તરસનુંયે ધોરણ નથી રહ્યું,
પાણી મળે છે તેય હવે પી જવાય છે.
‘સૈફ’ પાલનપુરી

લોકોનો વહેમ છે કે હું ગુમરાહ થઈ ગયો,
મારું યકીન છે કે આ તારી જ ગલી છે.
બરકત વીરાણી ‘બેફામ’

પથ્થર બનીને રહી જવાની મારી વેદના,
કૈં મીણ થઈને તારાં સ્મરણ ઓગળી જશે.
મનોજ ખંડેરિયા

હતા કંઈ તરબતર એવા સુરાલયમાંથી નીકળીને,
જુએ કોઈ તો સમજે, જાય છે વરસાદ પહેરીને.
‘મરીઝ’

પહેલાં પવનમાં ક્યારે હતી આટલી મહેક?
રસ્તામાં તારી સાથે મુલાકાત થઈ હશે.
‘આદિલ’ મન્સૂરી