Zakal Bhina Parijat

દુઃખની માફક સુખ પણ ગમે તે દિશામાંથી આગળથી ખબર આપ્યા વિના જ ચાલ્યું આવે છે. લોકો દુઃખની કથા બઢાવીચઢાવીને કહેતા ફરે છે અને સુખની કથા કહેવાની ઝાઝી પરવા નથી કરતા. મોટો લક્ષાધિપતિ પણ વાતવાતમાં ઠાવકાઈથી કહે છેઃ બસ, દાળ-રોટી મળી રહે છે. એને લાખો રૂપિયા આપ્યા બદલ ભગવાનને પસ્તાવો થાય એવી રીતે ગંભીરતાથી આવું વાક્ય ઉચ્ચારવામાં આવે છે. માણસ પોતાના સુખને ખુલ્લું કરવામાં પણ ગણીગણીને વર્તે છે.