Ek Pachi Ek

કલ્પનાની અગાસીએથી જોયેલું આકાશ કેટલું પણ સુંદર હોય પણ ત્યાં ફક્ત ઊડી શકાય, જીવી શકાતું નથી. જીવવા માટે તો પગ જમીન સાથે જોડાયેલા હોવા જોઈએ, જમીનના ખડતલપણાથી ક્યારેક પગ છોલાય, ચિરાય તો એ જ જમીનમાં ઊગેલાં ઘાસથી પાનીએ સુંવાળપ અનુભવાય; ખોડાયેલા પગ મૂળ બનીને જમીનમાં પેસે તો ક્યારેક પગ પૈડાં બનીને સરકતા જાય… આ બધું જ અનુભવતાં નજર જો આકાશની (કલ્પનાની) ક્ષિતિજ પર રમતી હોય તો આપણે જીવન (વાર્તા) જીવ્યા કહેવાઈએ. કપાળ કે હાથની રેખાઓ ભવિષ્ય ભાખી શકતી હશે, પણ વર્તમાન તો પગના ઘસારા જ જાણે છે. ‘એક પછી એક’ વાર્તાસંગ્રહની આ વાર્તાઓ પગના ઘસારાની વાર્તાઓ છે. યુવાનીની મુગ્ધતાથી લઈને સમાજના વિરોધની આ વાર્તાઓ, પાત્રો, ઘટનાઓ, સંવાદો કે પછી વાર્તાના અવકાશમાં મૂકેલું તથ્ય બધું જ તમારી સામે યથાતથા મૂકીને આમાંથી પસાર થવાનો તમને આવકાર છે. આજ સુધી ઘડાયેલી આ વાર્તાઓનું ઓસામણ તમને પોષણ અને આનંદ તો આપશે, પણ તમારો સ્વાદ કડવો કરી મૂકે તો પણ એનો આસ્વાદ અંતે તો પરિતૃપ્તિ કરાવશે એની ખાતરી છે.